Sigh...Ua cas hmo no yuav kho kuv siab ua luaj li. Hais tsis tau ib lo lus twg tawm qhia rau leej twg. Tsis paub hais tias hauv ntiaj teb no, kuv nco leej twg. Tsis paub hais tias, hauv ntiaj teb no, hmo no, nws puas nco txog kuv thiab. Ua cas hmo no, nim yuav kho kuv siab ua luaj.
Tau ntev li no, txoj kev hlub hauv kuv siab uas kuv xav muab rau lwm tus, twb tau ploj mus lawm. Zoo li hauv kuv nruab siab nruab plawv twb tsis muaj dab tsi ntxiv li lawm. Tsuas yog lam nyob hnub rhau hnub, hmo rhau hmo; tsis xav tias yuav nrhiav dua tus tshiab.
Ntau zaus kuv twb hais rau kuv tus kheej lawm hais tias kuv tsis nco koj lawm, kuv tsis hlub koj lawm. Tab sis zoo li kuv dag kuv tus kheej xwb. Hnub rhau mus lawm zuj zus, lub xyoo laus twb yuav rhau, lub xyoo tshiab twb yuav los txog, tab sis kuv nplooj siab tseem hlub koj li qub.
Tau ntev li no lawm, kuv yeej paub hais tias hauv koj nruab siab twb tsis muaj kuv lawm. Koj twb yeej mus muaj koj ib tug puag sov so, xav txog lawm. Tab sis ua cas kuv pheej tso tsis tau koj mus li? Yog vim li cas. Yog vim dab tsi?
Kuv yeej paub zoo hais tias kuv tsis xav tau koj rov qab vim hais tais txawm wb rov qab los ua nkauj ua nraug los tsis zoo dab tsi lawm. Tab sis txoj kev hlub kuv muab rau koj, kuv khuv xim tshaj plaws. Kuv khuv xim kuv txoj kev ua zoo rau koj, vim txog thaum kawg koj twb saib tsis muaj nuj nqis dab tsi rau koj kiag li. Koj muab tsuj nthi rau ntawm taws, ncaim kuv mus zoo li kuv yog ib tug neeg tsis muaj siab ntsws. Xav txog, kuv chim tshaj plaws. Kuv khuv xim kuv txoj kev hlub uas kuv muab rau koj tshaj plaws...tab sis muab xav mus xav los, txhua txhia yam uas wb muaj ua ke, nws tshwm sim vim yog wb txoj hmoo. Yog kuv tsis ntsib koj, kuv yeej tsis paub tias neeg lub siab zoo li cas.
Sigh...tab sis tau ntev li no lawm...kuv pheej xav txog koj. Kuv pheej nco txog koj. Tej thaum, tseem xav muab txhua txhia yam yav tag rhau los coj los hais kom tag seb puas zoo kuv lub siab me ntsis...
Tiam no, yog kuv tsis tau koj, kuv yuav tsis xav tau leej twg. Tab sis tiam no, kuv twb tsis xav tau koj lawm, ces kuv yeej yuav tsis xav tau leej twg.
No comments:
Post a Comment