Koj ua rau kuv lub siab mob koj tsis paub. Koj ua rau kuv tu siab koj tsis quav ntsej. Koj tsis paub tias kuv ua tag kuv tswv yim tsa lub ncauj los thov, los nug koj ib lo seb koj yuav hais li cas. Kuv yeej paub zoo lawm tias hauv koj lub siab koj yeej tsis muaj kuv los lawm ntev, tab sis kuv lam nug seb koj puas yuav teb thiab hais tau ib qho kom kuv zoo siab xwb os. Tab sis hnub no kuv paub tias nws yeej tsis muaj ntxiv lawm os. Txawm yuav thov, thiab yuav nco, yuav hlub los ntshe tsuas yog kuv ib leeg hlub, nco, thiab tshua lawm xwb. Ntawm koj ces twb ncaim lawm ntev. Lam muab lub cev nrog kuv nyob ua phooj ua ywg kom txhob tu siab lawm xwb.
Txij hnub no lawm yav tom ntej, kuv mam li ua ib siab tiag tiag os. Mam li tsis tsa ncauj los nug kev pab. Mam li quaj twj ywm, xav twj ywm rau hauv kuv lub siab yog tias nco txog koj os. Txawm mob siab los cia yus ib leeg mob thiaj li tsis muaj kev ntxhov, kev ntxub rau lwm tus.
Ib sim neej no ces hlub ib vuag yeej yuav nco ib sim. Mam li muab kuv txoj kev hlub zais khaws cia rau hauv nplooj siab seb lwm hnub lub cev lwj ua av lawm seb puas yuav tshuav ib nplooj siab tsis lwj rau koj os.
No comments:
Post a Comment